حكاية زينة و سليم/بقلم يحيى نفادي سيد
من الملاحم الشعبية
((( حكاية زينه وسليم 1)))
عن حكاية زينه يا ما قال
المداحين مواويل
حكاية تحكيها الصبايا
ف القرى والنجوع وكتر
فيها القال والقيل
وادي مداح قرية دهشان
بحييي ف ليلة سيدي عبد الجليل
أتلم أهل القرية وطلبوا
يسمعوا حكاية زينه والشاب
سليم الأصيل
قال المداح أول ما نبدأ الكلام
نبدأ بالصلاة ع الحبيب المختار
زينه صبية غير كل الصبايا
الحسن وصفها والأدب سلسال
تربيه والشباب ليها بيميل
أبوها راجل كبارة وهي دنيته
و اللي فاضل م عمره ليه قليل
م بكرة كل صبحيه تاخد زلعتها
تملاها م قنا الحج جميل
وف صباحية يوم م الأيام شفها
سليم واحتار فكره لما شاف حسنها
كما النسمة والعليل
حاول يقرب منها ويكلمها لكن صدها
كان بركان اشد م الغليل
جمالها ما فارق خياله وراح يسأل
عنها الجيرة وعن كل التفاصيل
قالوا لا تسأل عنها ولا تقرب أبوها
حجبها وخلى قلبها م غير دليل
وصفولوا درها ومن غير تردد
طرق بابها وقلهم عابر سبيل
أبوها نادي ع زينه وقال ما تردي
ليه طلب حاجه دا غريب وضيافته
ع أد الحال م غير تعويل
فتحت الصبية الباب وسليم ملهوف
يسمع أتفضل ويسمع صوتها ف
حرمة التفضيل
أبوها سأله عن أسمه رد أنا سليم
ولد الشيخ قنديل
استغرب أبوها وقال أبوك راجل طيب
وسيرته عزه وتبجيل
قال منتاش غريب ولا عابر سبيل
ولكن صوت ف لهفة المشتاق الذليل
سكت سليم وبص لزينه قرت عيونه
وقالت ياخد واجبه وبلاش تعطيل
وفي يوم قامت القرية على خبر وفاة
أبو زينه والكل زعل عليه وشالوا
جسده النحيل
لقيت الصبية نفسها وحيدة وصبر ليلها
صبر طويل
يا مين ع البنية يرحم ضعفها ويكون ليها
معين وكفيل
أصل دوار الزمن ما يخلي ف الأرض
ينابيع والكل للزمن بيدور ع سلسبيل
&&&&&&&&&&&&&&
وللملحمة بقية
يحيى نفادي سيد
تعليقات
إرسال تعليق